Պատրաստեք բուլկին այս բաղադրատոմսով և կստանաք անչափ համեղ և գեղեցիկ մատուցմամբ քաղցրավենիք։ Համոզված եղեք, այն շատ կհավանեն ոչ միայն ձեր երեխաները, այլ նաև ընտանիքի մյուս անդամները։
Ձեզ անհրաժեշտ կլինի՝
Խմորի համար․
Սերուցքային կարագ — 50 գ
Կաթ — 200 մլ
Հավկիթ — 1 հ․
Շաքարավազ -100 գ
Բուսայուղ — 3 ճ․ գ․
Խմորիչ — 1 ճ․ գ․
Աղ՝ մեկ պտղունց
Վանիլին
Ալյուր — մոտավորապես 2,5 — 3,5 բաժակ
Խճողակի համար․
Այն կարող է լինել ցանկացած տեսակի, կարող է և լինել առանց դրա։ Կարելի դնել մեկ կտոր շոկոլադ։
Նաև անհրաժեշտ կլինի 1 ճ․ գ․ սերուցքային կարագի +1 ճ․ գ․ շաքարավազի + 3 ճ․ գ․ ալյուրի խառնուրդ
Տաք կաթի մեջ լցնել խմորիչը և շաքարավազը, լավ խառնել և թողնել 15 րոպե։ Մեկ այլ տարայի մեջ լցնել հալեցրած սերուցքային կարագը, ավելացնել հավկիթը և գդալով խառնել, ապա լցնել բուսայուղ, վանիլին, աղ։ Լցնել խմորիչը և քիչ — քիչ ավելացնել մաղած ալյուրը։
Ծածկել և թողնել 1 ժամ խմորը բարձրանա ։ Դրանից հետո խմորը բաժանել ութ հավասար մասերի։ Յուրաքանչուրի մեջ դնել մեկ գդալ խճողակ և ձեռքերով ծածկել ու ձևավորել գնդիկներ։
Յուղաթղթով նախապատրաստած ձևամանը պատել կարագով և վրան դասավորել պատրաստի գնդիկները, ծածկել պոլիէթիլենային թաղանթով և սպասել 15 րոպե, որից հետո վրան քսել կաթի և ձվի խառնուրդ, ապա թխել 180 աստիճան տաքացված ջեռոցում 30 րոպե։
