Երեկվա կարևոր լրատվական լուրերից մեկն էլ գերիների վերադարձի մասին լուրն էր։ Եվս հինգ երիտասարդ տուն վերադարձավ։ Եվս հինգ փլված ճակատագիր այսօրվանից կվերանորոգվի։
Անպատկերացնելի է այն մոր ուրախությունն ու հոգեկան ապրումները, երբ նա իմանում է գերեվարված որդու վերադարձի մասին։ Սակայն ուրախությունն ու հույզերը կրկնապատկվում են, երբ նա այդ մասին իմանում է բոլորովին պատահաբար՝ հեռուստացույցից։
Ինչպես հայտնի է, երեվ վերադարձած երիտասարդներից չորսը Շիրակից էին, մեկը՝ Մասիսից։ Վերադարձած շիրակցիներից մեկի՝ քսաներեքամյա երիտասարդի մայրը որդու վերադարձի մասին հենց հեռուստացույցից է իմացել։
Նա սկզբում, լսելով իր տղայի անունը, չի հավատացել ականջներին, հետո ներս են մտել հարևանները՝ շնորհավորելու և աչքալուսանք տալու։ Մայրը ցանկացել է, որ մյուս բոլոր սպասող մայրերը ևս այսպիսի ուրախության պահեր ապրեն՝ լսելով իրենց զավակների վերադարձի մասին։
Շիրակցի երջանկացած մայրը վստահ է, որ եթե իր որդին եկել է, ապա մյուս սպասող մայրերի որդիներն էլ կգան։
