Անմահացած հերոս Ալբերտ Հովհաննիսյանի հայրը՝ Արտակը, իր սոցհարթակում գրում է հետևյալը. «Իմ հայ ժողովուրդ, անընդհատ զանգեր ու նամակներ եմ ստանում՝ ծանոթներից ու անծանոթներից, բաց ու փակ համարներից, անանուն ու կեղծ էջերից:
Ասել եմ ու ստիպված եմ կրկնել, որ բավական է անտեղի շահարկել իմ արած քայլերը: Այո՛, ես իմ որդուն՝ Ալբերտին, Հայրենիքին տալուց բացի շատ ու շատ այլ գործեր եմ արել Հայրենիքի պաշտպանությանը նպաստելու համար և հիմա էլ պատրաստ եմ ամեն ինչի, բայց առանց հանրայնացնելու, առանց ավելորդ պաթոսի:
Ինձ բազում նամակներ են գրում և փորձում քննադատել կամ շատ դեպքերում հունից հանել փակ էջերով, այդպիսի մարդկանց պարզապես կասեմ, որ անգամ չեք գիտակցում, որ ինձ հունից հանելն այդքան էլ հեշտ չէ:
Ավելին՝ ի պատասխան ձեր շատ նամակների, ուզում եմ վերահաստատել, որ չեմ եղել քաղաքական որևէ թիմում, չեմ էլ պատրաստվում ներքաշվել քաղաքական խաղերի մեջ: Իմ հավատամքը ուժեղ Հայաստանն է և միասնական հայ ժողովուրդը, ինչի համար իրենց կյանքը չխնայեցին իմ և շատերի զավակները:
Փառք մեր հերոսներին և հավերժ խոնարհում»: