Այսօրվա՝ նախարարության հրապարակած տվյալները մեծ ցավով ընդունվեցին, քանզի հրապարակման մեջ հայտարարվում էր նաև քսանյոթամյա պացիենտի մահվան մասին: Բացի այն, որ վերջին երկու օրվա ընթացքում կտրուկ ավելացել է թագավարակի տարածման տեմպը, այն նաև սկսել է ավելի երիտասարդ պացիենտների կյանք խլել:
Այսօրվա վիրուսային հաստատված դեպքերի թիվը հասել է ութսուներկուսի: Ճիշտ է՝ սա ավելի քիչ է, քան երեկվա հաստատված դեպքերի քանակը, սակայն դարձյալ մտահոգիչ փաստ է:
ԱՆ մամլո խոսնակ Ա. Նիկողոսյանը առանձին գրառմամբ անդրադարձել է մահացած երիտասադ պացիենտի դեպքին, քանզի համացանցային հարցումները բազմաթիվ էին: Նա մանրամասներ է ներկայացրել՝ գրելով, որ պացիենտը եղել է աղջիկ, նա ունեցել է ի ծնե խրոնիկական հիվանդություններ, որոնք առավել բարդացել ու սրվել են վիրուսային վարակի պատճառով՝ ի վերջո հանգեցնելով մահվան:
Սակայն մամլո խոսնակը կտրականապես դեմ է առանց ընտանիքի թույլտվության այլ տվյալների հրապարակմանը՝ կոչ անելով հանգիստ թողնել ծնողներին՝ հասկանալով վերջիններիս ապրումները։