Արաքսյա Մելիքյանի 35-ամյակը և անակընկալ հյուրերը.
Արաքսյա Մելիքյանը դարձել է 35 տարեկան: Հոբելյարը BRAVO.am-ին ասել է, որ առաջին շնորհավորողները դերասան Լեռնիկ Հարությունյանն ու նրա կինն են եղել. «Ուղիղ կեսգիշերին հյուր եկան: Նրանց այցը հաճելի անակնկալ էր ինձ համար: Առավոտյան էլ մի շարք հյուրեր ունեցա. չգիտեի, որ հորաքույրս Եվրոպայից եկել է: Մտերիմներիս հետ մինչեւ կեսօր նշելուց հետո, ամուսնուս եւ երեխաներիս հետ եկա Ծաղկաձոր»:
Անակնկալներն այսքանով չեն ավարտվել.«Ծաղկաձորում մեր հանգիստն էինք վայելում, երբ գիշերը Խորեն Լեւոնյանը, Նարեկ Հայկազյանն ու Ծովինար Մարտիրոսյանը, Լեռնիկ Հարությունյանն ու կինը մեզ հյուր եկան: Նրանց այցը շատ երջանկացրեց ինձ: Ուրախ ժամանակ անցկացրինք»:
Տոնական տորթի մոմերը փչելիս դերասանուհին հանգիստ կյանք է ցանկացել. «Միգուցե տարօրինակ հնչի, բայց ես նյութական ոչինչ չեմ ցանկանում, փառք Աստծո, լավ ընտանիք ունեմ, սիրելի աշխատանք, սիրելի դերեր, վստահ եմ՝ դեռ ավելի լավ կերպարներ եմ մարմնավորելու: Այժմ միայն խաղաղ կյանք եմ ուզում իմ ու հարազատներիս համար»:
Խոսելով նվերներից՝ հոբելյարն ասել է, որ ամուսինը՝ դերասան Անդրանիկ Զաքարյանը, ընտանեկան հանգիստ է նվիրել, իսկ հորաքույրը՝ թանկարժեք ժամացույց, որ վաղուց էր հավանել:
Արաքսյան մտաբերել է նաեւ իր 30-րդ տարեդարձը.«Այդ օրն անսովոր զգացողություններ ունեի, ինձ թվում էր՝ աշխարհի վերջն է, ծերացել եմ, բայց ժամանակի ընթացքում հասկացա, որ անիմաստ զգացողություններ եմ ունեցել, ուրախ կյանքը 30-ից հետո նոր սկսվում է:)»:
Աղբյուր` bravo.am
